Xhamitë e një shekulli në Kamenicë

Kishte bërë rreth 3 kilometra rrugë për të ardhur në xhaminë e Krilevës , ani pse kishte kaluar afër një objekti të tillë të kultit islam .

Asllan Fehrat Demolli , ish-minator , tash 65 vjeç, ka nostalgji për xhaminë e moçme . Që kur ka qenë 12 vjeç është falur në këtë xhami , nën shoqërinë e të atit , emrin e të cilit e thekson me ngritje zëri , shkruan sot “Koha Ditore”. Rrjedhimisht, duke dhënë shenjë se për të dhe fshatarët e tij në këtë pjesë të Komunës së Kamenicës trashëgimia ka shumë rëndësi .

Xhamia e Krilevës është njëra prej xhamive që në këtë territor në lindje të Kosovës u ndërtuan në shekullin XIX . Shumë nga to ruajnë ende autenticitetin . Të tjerat janë të shpërndara nëpër fshatrat kodrinoro-malore të zonës . Një në Zhujë , një në Vryçec , në Meshinë e tjetra në Tygjec .

Minarja si shenjë e autenticitetit

Nga mesi i oborrit të xhamisë në Krilevë , pak para vaktit të “faljes së xhumasë”, Asllan Demolli , ndalet për të rrëfyer pak nga historia e “shtëpisë së Zotit”.

“Që kur i kam pas 12 vjet në këtë xhami kam ardh me u fal , bashkë me babën . Të gjitha janë shtëpi të Allahut , por unë këtu jam msu , e më tërheq . Jam falë nëpër shumë xhami në këto vjet që kam , përfshi edhe ato në Maqedoni , Preshevë , por si në këtë xhami nuk ndihem askund . Më ka mbet rrem i babës”, thotë Demolli .