Temperaturat e larta ndikuan në ndërprerjen e energjisë elektrike , sot në Kosovë

Moti i ftohtë është shumicën e rasteve arsye e ndërprerjeve të energjisë elektrike në Kosovë . Por temperaturat e larta që po mbizotërojnë këto ditë në Kosovë kanë bërë që sot të paraqitet një prishje në transformatorin matës të rrymës .

Në një njoftim për media thuhet se prishja në transformatorin matës është paraqitur në transformatorit T1 në anën 10 kV , në Nënstacionin 110/10 kV Prishtina 3 dhe si pasojë Nënstacioni ka mbetur pa tension nga ora 17:27.

“Ekipet e mirëmbajtjes te KOSTT sh.a kanë ndërmarrë masa të menjëhershme për të eliminuar efektet e kësaj prishje dhe në ora 19:32 furnizimi me energji elektrike nga NS 110/10 kV Prishtina 3 është stabilizuar”, thuhet në njoftim .