"Hëna e tërbuar" në Kinë [Video]

Festivali i mesit të vjeshtës në Kinë është koha kur njerëzit kthejnë kokën nga hëna , por banorët e qytetit Fuzhu patën mundësinë që të shihnin shumë më nga afër këtë trup qiellor që i bllokoi rrugën . Sigurisht nuk bëhet fjalë për hënën e vërtetë , por një hënë plastike të fryrë me ajër si pjesë e zbukurimeve që për shkak të erës së fortë të tajfunit Meranti, u shkëput nga vendi ku ishte fiksuar dhe shkaktoi mjaft probleme në trafik . Videot amatore të kalimtarëve të rastit shfaqin trupin qiellor pjesërisht të shfryrë që rrotullohet përmes një kantieri ndërtimi , mbi makina dhe pranë këmbësorëve . Banorët e zonës i gjetën shumë shpejt nofkën dhe e quajtën hëna e tërbuar, megjithëse pranuan se incidenti gjallëroi situatën e trishtë të festivalit që është dëmtuar ndjeshëm nga tajfuni . Pikërisht prej këtij të fundit , shumë njerëz në Kinë nuk do të shohin dot hënën gjatë festivalit që i kushtohet satelitit të vetëm natyror të Tokës . Kjo bëri që shumë komuna të vendosin hëna plastike të fryra me ajër për të zëvendësuar disi panoramën që do t’i mungojë shumë kinezëve ./TCH/