Përfundon takimi Vëllaznimi – Gjilani

Ka përfunduar ndeshja mes Vëllaznimit dhe Gjilanit – që u përcoll me shumë polemika e incidente në stadiumin e qytetit në Gjakovë.

Kjo ndeshje ka përfunduar me rezultatin e barabartë 0-0.

Pas këtij barazimi, Gjilani ka mbetur edhe për një edicion në Vala Superligë, kurse Vëllaznimi do të luajë në barazh.

Gjakovarët në barazh do të ndeshen me Ferizajin.

Ndeshja e sotme u përcoll me shumë tension dhe polemika. Gjakovarët nuk e mirëpritën një ‘provokim’ të Gëzim Rusit në minutën e 90’të të takimit dhe kështu filluan incidentet.

Tifozët e Vëllaznimit ishin shumë të nervozuar dhe filluan të hedhin gjësende në drejtim të lojtarëve mysafir, me ç’rast edhe lënduan Betim Haxhimusën.

Betim Haxhimusa mori lëndime në kokë dhe u drejtua në spital për mjekim më të detajuar. Pas gjithë këtij incidenti, gjyqtari kryesor i takimit, Genc Nuza ka urdhëruar zbrasjen e stadiumit.

Ndeshja u ndërpre për afro 15 minuta dhe lojtarët u dërguan në dhomat e zhveshjes. Kur stadiumi u zbras, lojtarët u rikthyen për t’i zhvilluar edhe gjashtë minuta lojë.

Rezultati më pas nuk ndryshoi dhe kështu Gjilani siguroi edhe matematikisht mbijetesën, kurse Vëllaznimi duhet të luajë në barazh me Ferizajin për ta mësuar fatin.

Vlen të ceket se ky takim ishte mjaft i tensionuar, me ç’rast edhe pesë lojtarë u ndëshkuan me karton të verdhë (para ndërprerjes).

Edon Sadriu, Kosumi dhe Ergon Hyseni u ndëshkuan për skuadrën e Gjilanit, ndërsa Lorik Rudi dhe Alban Dragusha për Vëllaznimin.