Matematicieni i artë, maturanti i “Petro Ninit”, i treti në Ballkan

Lorenc Bushi, maturant te “Petro Nini” fitoi medaljen e bronztë në Olimpiadën e 34-ë ballkanike të matematikës, të zhvilluar në Ohër të Maqedonisë. 

Lorenci është nxënës i shkëlqyer, por matematiken e njeh përtej tekstit klasik në shkollë. Historia e suksesit te tij ka një fillim të pazakontë. Mësuesja e matematikës në shkollën 9-vjeçare në Kavajë i vinte vetëm nota të ulëta. “Prindërit më thoshin që kisha aftësi për të bërë shumëzime me numra të mëdhenj në moshën 4, 5 vjeç. Aty e kuptuan që unë e kisha një potencial në matematikë dhe prandaj u habitën kur panë që notat e mia nuk ishin të larta. Sot nuk kam kontakte me mësuesen në Kavajë dhe mendoj se do të habitej kur të shikojë ku kam arritur sot. Besoj se ajo thellë-thellë e dinte potencialin tim”, shprehet Lorenc Bushi, maturant. Kjo ishte arsyeja pse familja e tij u shpërngul në Tiranë, ku Lorenci gjeti veten. “Kam punuar te gjimnazi me profesorin tim, i cili e dalloi potencialin tim në matematikë dhe gjithmonë më ka ndihmuar me materiale jashtë shkollore”, thotë maturanti. Me gjithë investimin shpirtëror dhe financiar të prindërve, Lorenci ja doli! 18-vjeçari e ka përfaqësuar Shqipërinë në disa olimpiada jashtë vendit, megjithëse shteti shqiptar nuk i përgjigjet atij. “Shpenzimet e biletave i kanë prindërit e mi, shteti nuk e njeh shoqatën e matematikës, ndryshe nga çdo shtet që i rimburson”, thotë Lorenc Bushi. Megjithëse i ri në moshë, Lorenci është i qartë për atë që kërkon dhe atë që meriton. “Synimi im i radhës është olimpiada botërore. Në çdo olimpiadë marr pjesë për të fituar, por për të dhënë maksimumin tim”, thotë maturanti./ TCH