Botërorit i “humbasin” 10 Topa të Artë brenda ditës

Botërori “Rusi 2018” do të mbahet mend për faktin se brenda një dite u eliminuan dy futbollistët që kanë dominuar futbollin në 10 vitet e fundit.

Leo Messi dhe Cristiano Ronaldo, fitues të 10 Topave të Artë të fundit, u larguan nga Botërori në të njëjtën fazë (1/8) dhe në të njëjtën ditë. Argjentina u mund 4-3 nga Franca, ndërsa Portugalia u mposht 2-1 nga Uruguaji.

Përsa u përket statistikave individuale, Messi shënoi vetëm një gol në “Rusi 2018” (ndaj Nigerisë), ndërsa Cristiano 4 (tregolësh ndaj Spanjës dhe një gol ndaj Marokut).

Pas eliminimit të Portugalisë dhe Cristiano Ronaldos nga Botërori, në rrjetet sociale janë publikuar statistika të përgjithshme të pabesueshme që kanë të bëjnë me dy lojtarët më të mirë të gjeneratës dhe me ekipet pjesëmarrëse në këtë garë.

Messi, nënkampion më 2014 dhe Ronaldo, gjysmëfinalist më 2006, asnjëherë nuk kanë shënuar gola në ndeshje përtej fazës së grupeve në botërorë, kurse Messi ka katër asistime dhe Ronaldo asnjë, raporton Insporti, duke iu referuar të dhënave të FIFA-s për këta dy futbollistë.

Sado e pabesueshme që mund të tingëllojë kjo statistikë, është një indikator se në ndeshjet e mëdha në kampionate botërore, edhe Messi (8 ndeshje në fazën e nokautit, 756 minuta dhe 23 goditje pa gol), por ehde Ronaldo (6 ndeshje në fazën e nokautit, 514minuta dhe 25 goditje pa gol)“abortojnë”, kur nga ta pritet më së shumti.