Dokumenti amerikan që po e dridh Serbinë. ‘Tmerrohet’ Vuçiq!

Amerikanët kanë dërguar javë më parë një dokument kornizë në Beograd, të përgatitur nga Instituti Lindje – Perëndim, i cili dokument, sipas gazetës më të pavarur në Serbi, Danas, e thotë qartë se dialogu i Brukselit duhet të sjellë njohjen e Kosovës nga ana e Serbisë. Danas tutje shkruan se kryeministrja Ana Brnabiq ishte mysafire e këtij instituti amerikan me ndikim, Institutit Lindje-Perëndim, që përgatiti dokumentin për çështjen e Kosovës e cila muajin e kaluar iu prezantua Beogradit. Në dokumentin “Koha për veprim në Ballkanin Perëndimor – rekomandimet për diplomacinë amerikane” shkruan se SHBA-ja duhet të inkurajojnë Bashkimin Evropian të rinisë dialogun e Kosovës me Serbinë në mënyrë që “të ndalet rrëshqitja e ngadalshme në një konflikt të ngrirë”. Ndërsa, anëtarësimi në NATO sipas këtij dokumenti, do të duhej të mbetej opsion për Serbinë, por se pritshmëritë e SHBA-së duhet të jenë të ulëta për shkak të së kaluarës së operacioneve të NATO-s në regjion, si dhe për shkak të kundërshtimit me gjasë të ashpër rus. Në anën tjetër, në Kosovë pozita dhe opozita nuk po arrijnë të gjejnë konsensusin për unitet në këtë fazë të re të dialogut me Serbinë, që pritet të mbyllë një çështje të hapur prej një shekulli mes popullit serb dhe shqiptar.