Arrihet marrëveshja për 6 milionë euro në sezon, Conte bëhet me ekip të ri

Milani ka arritur akordin me Antonio Conten.

Është ky lajmi më i fundit për sa i përket situatës së stolit kuqezi.

Problemi për zyrtarizimin e marrëveshjes vazhdon të jetë shkarkimi i italianit nga Chelsea.

48-vjeçari pretendon të dëmshpërblehet nga londinezët për prishje para kohe të kontratës dhe dëme ekonomike, akuzë kjo e fundit, që edhe klubi ia drejton italianit për shkak të zhvlerësimit që i bëri një lojtari si Diego Costa duke e “shkarkuar” më anë të një mesazhi.

Duke mos qenë të interesuar për ta zgjidhur çështjen në gjykatë, vartësit e Roman Abramovich kanë bërë një hap pas duke i ofruar Contes 5 milionë euro për t’u ndarë në paqe, ofertë kjo që bashkangjitur edhe me projektin e Milanit, e lëkund trajnerin që të pranojë.

Sipas “Daily Mail” që ka zbuluar edhe lajmin, Konte ka pasur javën e kaluar një seri takimesh në Lampeduza ku po shijon disa ditë pushimi.

Marrëveshja është arritur mbi bazën e 6 milionë eurove plus një seri bonusesh me Antonio Conten që do të emërohej në detyrën e re përpara fillimit të kampionatit.